Wala umanong kinalaman si Vice President Sara Duterte sa petisyong inihain sa Korte Suprema na kumukuwestyon kay Senate President Chiz Escudero bilang presiding officer ng kanyang impeachment trial.
Ayon kay defense spokesperson Atty. Michael Poa, wala silang napag-usapan ng Bise Presidente tungkol sa naturang petisyon.
Aniya, kaninang umaga lamang niya nalaman na naghain ng petisyon si Atty. Israelito Torreon, at wala rin silang naging usapan tungkol dito.
Matatandaang hiniling nina Torreon at walong iba pang abogado sa Korte Suprema na magpalabas ng temporary restraining order upang ipatigil ang impeachment trial. Iginiit nila na ang Senate President lamang ang maaaring mamuno sa paglilitis.
Sa kabila nito, sinabi ni Poa na maayos ang naging takbo ng unang dalawang araw ng impeachment trial at wala siyang masasabi laban kay Escudero bilang presiding officer.
Samantala, sinabi rin ni Poa na nakausap niya si Vice President Duterte matapos ang pagdinig. Aniya, wala umanong naging negatibong reaksyon ang Bise Presidente sa naging takbo ng trial at nagpasalamat pa ito sa kanyang defense team sa kanilang trabaho.
