Nanawagan ang Philippine National Police sa lahat ng ahensya ng pamahalaan na magsagawa ng masusing pagsusuri sa kanilang digital security matapos maiulat nitong Sabado ang defacement ng official website ng House of Representatives.
Ito'y ilang araw lamang matapos ding ma-target ang website ng Senado.
Ayon kay PNP Chief Gen. Jose Melencio Nartatez Jr., inatasan na niya ang Anti-Cybercrime Group na makipag-ugnayan sa information technology at cybersecurity personnel ng Kamara.
Layunin ng hakbang na matukoy ang source, paraan at lawak ng naturang cyberattack na tumama sa government website.
Posibleng sampahan ng kaukulang kasong paglabag sa cybercrime law ang mga mapatutunayang nasa likod ng defacement habang nagpapatuloy ang imbestigasyon.
